اختيار اللاب توب الانسب لاحتياجاتك

وانت بتفكر تشتري لاب توب لازم تسأل نفسك كذا سؤال عشان تقدر تعدي المرحله دي بنجاح وتاخد كاس الامم للابتوبات لان من غير ماتحدد بعض الامور هاتصعب عليك المشكله ومشوار البحث هايطول قوي وهاتحتار تختار ده ولا ده عشان تقدر تتخطي المشاكل دي لازم تسأل نفسك شويه اسئله هاتحللك المشكله وهاتوفر علي نفسك وقت كتير 

1-ميزانيتك اد ايه؟
2-هل هذا الجهاز الاساسي بتاعك؟
3-هاتتنقل بيه كتير- اكتر الاوقات بتاعتك هاتقعد بيه ف البيت؟
4- حدد هدفك وغايتك منه
5-المواصفات المناسبه مع سعرك


1- الميزانيه  

 لازم تدرس الميزانيه بتاعتك(فلوسك) اللي هاتقدر تجيب بيها اللاب توب الجديد او تحدد فئه سعريه معين مثلا عايز اشتري لاب توب يكون من 2000 جنيه اللي 2500 جنيه بحيث تكون رايح تجيب جهاز بميزانيتك ومتزودش عنها ودماغك تروح لبعيد ولو ماحددتش فئه ليك وسايبها مش هاتقدر تحدد الجهاز اللي انت عايزه لان هايكون قدامك خيارات كتير جدا وهاتصعب الامر عليك اكتر ماتضيعش وقتك في البحث عن لابتوبات اعلي من الفئه اللي انت محددها ابحث فقط في فئتك السعريه

2-  الجهاز الرئيسي او الاساسي الخاص بك
سؤال مهم لكل اللي بيشترو لاب توب او اللي مقبلين علي الشراء
 الجهاز ده جهازك الاساسي ؟
يعني معندكش جهاز غيره وهاتقعد عليه كل اوقاتك لو كان كده فلازم تجيب مواصفات عاليه خاصه باستخداماتك لانك بالتاكيد هاتشري جهاز تلعب وتتصفح وتشغل ملتيميديا  فلازم تهتم بموضوع الشاشه وتجيب شاشه تعدي ال15 بوصه عشان ماتقصرش علي نظرك وتكون واضحه وتقدر تشتغل عليها فتره طويله اما لو كان الجهاز ده هايكون جهازك التاني او بديل لجهاز تاني بتستخدمه مثلا رايح الجامعه او الشغل او رايح عن صحابك الخيار الافضل ليك 15 بوصه او تجيب اقل لانك مش هاتمشي بتلفزيون رايح جاي بيه وطالما مش جهازك الرئيسي حاول تخليه علي قد استخداماته الي جايبها عشانه 

3- هل ستتنقل به كثيرا


والسؤال ده يعتبر تكمله للسؤال اللي فات بعد ماتحدد الميزانيه والجهاز بتاعك ده الرئيسي ولا لا اسأل نفسك هاتتحرك بيه كتير اغلب الناس بتستخدم اللاب توب في المنزل او ف العمل لو هاتتنقل بيه كتير اهتم بالوزن لان في لابتوبات وزنها كبير نسبيا ف مش هاينفعش تشيل الجهاز بتاعك رايح جاي بطل كمال اجسام شايل لاب 5 كيلو رايح وجاي غير الشاحن اللي معاه فلازم تشوفلك حاجه تناسبك لو هاتتنقل لو مش هاتتنقل خالص هاتلك جهاز واربطه ف المكتب مش قصدي تجيب حبل وتلفه حوالين اللاب لا انا اقصد ان الوزن مش هايفرق كتير وموضوع مهم للبطاريه انك لازم تهتم بالبطاريه اللي هاتجيبه يعني لو هاتجيب جهاز تروح بيه الشغل الجامعه المكتب خروجات اهتم بالبطاريه عشان تقدر تطول معاك وطول منتا قاعد ف البيت حاول تبعد عن استخدام البطاريه واستخدم جهازك عن السلك الكهربي 


4-غايتك وهدفك منه



حدد غايتك من اللاب توب هاتستخدمه في التصفح ولا الجيمز ولا تشغيل الملتيميديا ولا في التصميم والجرافيك لو هاتختار جهاز للتصفح والملتيمديا ونت فاللاب توب العادي يفي بالغرض 
مش هاتحتاج لجهاز خارق
ومش شرط انك تكون عايز تشتري لاب توب ممكن تحتاج لنوت بوك او الترا بوك وومكن تكون محتاج جهاز ميني صغير علي قدك لو هاتستخدمه في حاجات بسيطه فهو مخصص للاستخدمات المكتبيه كالتدوين والجداول والتصفح وهو مناسب للطلاب والمسافرين فهذه معده لذلك
الميني ياتي في حدود ال10 بوصه او اقل ومواصفاته بسيطه وسعره علي اد الايد وحط في اعتبارك ان الجهاز ده مايكون جهازك الرئيسي لان شاشته قليله وهاتتعب نظرك اما اجهزه الالترا بوك اجهزه بمواصفات عاليه بشاشات متوسطه علي حدود 12 او 13 بوصه وتقنيه عاليه ووزن وسمك اقل ولكن سعرها اعلي 


5- مواصفات جهازك 

بعد ماعذبتك شويه ف الاسئله اللي فوق انا عارف نيجي لاخر نقطه خلاص دي اخر نقطه
بعد الميزانيه والمقاس والفئه نيجي لاختيار المواصفات ممكن تلاقي المواصفات متشابهه ولكن الفرق في نوع الجهاز فلازم تختار مواصفاتك حتي لو هاتزود علي ميزانيتك مبلغ بسيط عشان تجيب اللي انت عايزه 

• شوف البروسيسور (المعالج) وهو اهم حاجه ف الجهاز لانه المحرك الاساسي للجهاز ووظيفته انه ينفذ كل العمليات والبيانات اللي بيطلبها المستخدم منه وكل ماكان البروسيسور اعلي كان افضل 

• الكاش ميموري وده عباره عن ذاكره بمساحه صغيره لكن السرعه بتاعته طياره سريعه يعني ودي بتستخدم لنسخ الاوامر اللي بتتكرر علي طول عشان يبقا حافظها 

•  الرامات كل ماكانت مساحته اكبر وسرعه اعلي كل ماكانت افضل وده علي حسب استخدماتك يعني استخدم الرامات علي قد استخداماتك ولو ان كترها مش هايخسر

• كارت الشاشه مشكله القرن اول حاجه دلواقتي الناس بتدور عليها الجهاز وتسأل هو كارت الشاشه اد ايه ؟!! وطبعا كل شركه من شركات كروت الشاشه ليها مميزاته وكل شركه بتحاول تطور من كروتها كل فتره  لذالك ماتبصش علي المساحه جيجا ولا اتنين لانها بتفرق بس لو وصلت الجهاز بشاشه خارجيه لو اللاب حوالي 15 بوصه فهو مناسب جدا موضوع كارت الشاشه طويل عريض وان شاء الله هانعرضه في موضوع منفصل 

•  الهارد (القرص الصلب)  علي حسب احتياجاتك الشخصيه ويفضل الهارد 500 لو انت مابتخزنش كتير 

• مخارج الجهاز زي hdmi ودي وسيله اسرع من الكابل العادي في توصيل اللاب توب بشاشه خارجيه

•  واحرص علي ان يكون الجهاز بتاعك فيه مخارج USB من الجنبين لانه هاتحتاجهم او حتي يو اس بي 3 (USB 3) واليو اس بي ثري تقنيه جديد لنقل الملفات بسرعه عاليه تفوق سرعه اليو اس بي العادي في النقل 10 اضعاف وبداءت تتوافر في اجهزه كتير وابتدت تنتشر ودلواقتي بقا في فلاش ميموري يدعم اليو اس بي ثري وهاردات

 بعد ماحددت الجهاز روح شركه ديل او اتش بي وقلهم يعملولك جهاز علي قد مواصفاتك وسعرك وهما مش هايتأخرو بس متنساش تقولهم انا جاي من طرف جديد لانج وهما هايتوصو بيك

خلينا في المضمون بعد ماخلصت المهمه بتاعه اختيار جهازك بمواصفاتك وميزانيتك ماتدورش كتير 

اسألنا عن مواصفات جهاز معين عايز تجيبه  او سعر جهاز معين ماتدورش وتعالي علي عندنا وهانفيدك بكل كبيره وصغيره ونوفرلك اماكن البيع والاسعار وارقام التليفونات عشان ماتدبش المشوار ع الفاضي وانت قاعد في بيتك بحيث تروح تجرب الجهاز وتشتريه وانت متطمن ارجو اني اكون وصلت لكم المعلومه بشكل مبسط وسريع ولغه بسيطه عشان تدخل الدماغ ماتطلعش 

واخيرا ان كان من توفيق فمن الله وان كان خطأ فمن نفسي ومن الشيطان

لو عندك اي استفسار او اي حاجه خش هنا لاتتردد

جديد لانج كوم